Азбука бяспекі для дашкалят: кармянскія ратавальнікі правялі пазнавальны занятак у дзіцячым саду

Фарміраванне культуры бяспекі жыццядзейнасці пачынаецца з самага ранняга ўзросту. Каб простыя і жыццёва важныя правілы засвойваліся лёгка, ратавальнікі выкарыстоўваюць гульнявыя і інтэрактыўныя формы зносін. Работнікі Кармянскага раённага аддзела па надзвычайных сітуацыях сумесна з прадстаўнікамі АСВОДа наведалі выхаванцаў дзіцячага сада № 6 г.п. Карма.

Небяспечныя гульні і алгарытм дзеянняў у НС

Першы блок прафілактычнай сустрэчы быў прысвечаны правілам паводзін у побыце і папярэджанні пажараў. Работнік МНС даступнай мовай расказаў дзятве, да чаго можа прывесці дзіцячае свавольства з агнём, а таксама падрабязна растлумачыла, як трэба дзейнічаць у выпадку ўзнікнення экстранай сітуацыі.

Для лепшага ўспрымання інфармацыі ратавальнікі падрыхтавалі яркія ілюстрацыйныя карткі з выявай розных небяспечных сітуацый. Разглядаючы карцінкі, малыя з азартам ўключыліся ў дыялог: яны наперабой тлумачылі, як правільна паступіць у тым ці іншым выпадку і якіх памылак варта пазбягаць.

Не менш важнай часткай занятку стала адпрацоўка выкліку экстраных службаў. Разам з ратавальнікамі дзеці ўзгадалі ключавыя нумары — 101 і 112. Пасля гэтага хлопцы змадэлявалі рэальную тэлефонную размову: «тэлефанавалі» ў службу выратавання, вучыліся не панікаваць, дакладна называць сваё імя, хатні адрас і прычыну выкліку.

Акрамя таго, работнікі МНС прадэманстравалі дашкалятам аўтаномны пажарны апавяшчальнік. Ратавальнікі расказалі, чаму гэты маленькі прыбор называюць «надзейным вартаўніком» і як яго гучны сігнал дапамагае своечасова даведацца пра задымленне.

На вадаём ‒ толькі з бацькамі!

Не засталіся без увагі і правілы бяспекі на вадзе, пра якія падрабязна расказалі прадстаўнікі Асвода. Дашкалятам растлумачылі, чаму дзецям катэгарычна забаронена хадзіць на вадаёмы без суправаджэння дарослых і чым небяспечныя самастойныя прагулкі ля рэк і азёр. Рабятам таксама расказалі, як трэба паводзіць сябе на беразе і ў вадзе, прадэманстравалі выратавальную камізэльку, растлумачыўшы, для чаго яна патрэбна і як дапамагае чалавеку ўтрымацца на воднай роўнядзі.

Каб замацаваць атрыманыя веды, ратавальнікі прапанавалі дзецям разгадаць тэматычныя загадкі. Дашкаляты праявілі выдатную кемлівасць і смела давалі правільныя адказы на кожнае пытанне.