Петрыкаў. Маленькі прыбор – сур’ёзная абарона

На тэрыторыі Петрыкаўскага раёна працягваюцца рэйды па прыватных домаўладаннях уразлівай катэгорыі насельніцтва. У адным з іх з інспектарам пабывала карэспандэнт «Петрыкаўскіх навін».

Грамадзяне, якія вядуць асацыяльны лад жыцця, на жаль, часта становяцца віноўнікамі надзвычайных сітуацый, якія заканчваюцца маёмаснымі стратамі, нанясеннем урону здароўю і жыццю людзей. Каб паўплываць на асоб, злоўжываюць алкаголем, папярэдзіць пажары, якія яны могуць справакаваць, супрацоўнікі Петрыкаўскага РАНС рэгулярна праводзяць прафілактычныя рэйды. На гэты раз у цэнтры ўвагі домаўладанні, размешчаныя ў аграгарадку Бабунічы і вёсцы Міхедавічы.

Ужо ў двары аднаго з дамоў становіцца зразумела, што тут асабліва патрабуецца кантроль супрацоўнікаў РАНС.

Унутры дома – антысанітарыя: паўсюль раскіданыя недакуркі. Аб правілах супрацьпажарнай бяспекі тут ніхто не непакоіцца. Агляд жылых памяшканняў выявіў яшчэ адну зону рызыкі – няспраўнае пячное ацяпленне, якое таксама можа стаць прычынай пажару. Інспектар указау на парушэнні і растлумачыў, як іх выправіць, уручыўшы памятку па супрацьпажарнай бяспецы.

Далей накіроўваемся ў суседнюю хату. Брамку адчыняе жанчына пенсійнага ўзросту. Выратавальнікі прадэманстравалі жанчыне, як працуе АПА, як замяніць батарэйку і чаму нельга яго здымаць ці фарбаваць.
Пры наведванні домаўладанняу прыемна бачыць, што ўстаноўка аўтаномных пажарных апавяшчальнікаў для іх ужо стала правілам. Гэта значыць, што работа выратавальнікаў не дарэмная, ды і самі грамадзяне занепакоены сваёй бяспекай.

– У нашым узросце кожны лішні вартаўнік – гэта добра. Слых ужо не той, але гэты гук я сапраўды пачую! Дзякуй супрацоўнікам РАНС, што наведалі, пагаварылі па-чалавечы, усё растлумачылі. Жыву адна, бывае страшнавата. А зараз ёсць гэты «памочнік», – падзялілася меркаваннем адна з гаспадынь.