Павысіць узровень бяспекі: акцыя «За бяспеку разам» у Лельчыцкім раёне.

З 22 сакавіка ў рэспубліцы праходзіць пажарна-прафілактычная акцыя "За бяспеку разам". Каб павысіць узровень бяспекі насельніцтва і знізіць колькасць пажараў, выкліканых грэбаваннем правіламі бяспекі і неасцярожным абыходжаннем з агнём, Лельчыцкія ратавальнікі праводзяць комплекс мерапрыемстваў.

У рамках акцыі ратавальнікі правялі навучальныя мерапрыемствы з работнікамі службаў, якія аказваюць дапамогу дома. Намеснік начальніка райаддзела выступіў перад калектывамі тэрытарыяльнага цэнтра сацыяльнага абслугоўвання насельніцтва і КВУП «Лельком», дзе расказаў аб бягучай аператыўнай абстаноўцы ў раёне, асноўных прычынах узнікнення пажараў і патэнцыйна небяспечных фактарах, якія могуць быць у дамах і кватэрах.

Выратавальнік акцэнтаваў увагу на важнасці захавання правіл эксплуатацыі пячнога ацяплення і электраабсталявання.

‒ Асаблівай увагі і кантролю патрабуюць грамадзяне, якія кураць і злоўжываюць спіртнымі напоямі, бо гэта часта становіцца прычынай вогненных трагедый, ‒ адзначыў Аляксандр Гірдзюк.

Важным момантам стала абмеркаванне тэмы аўтаномных пажарных апавяшчальнікаў.

‒ Звяртайце ўвагу на наяўнасць і спраўнасць у дамах і кватэрах грамадзян аўтаномных пажарных апавяшчальнікаў, ‒звярнуўся да ўдзельнікаў мерапрыемстваў работнік МНС і расказаў рэальныя прыклады выратавання дзякуючы гэтым прыладам.

Акрамя таго, работнік службы "101" падкрэсліў важнасць падтрымання парадку на прыдамавой тэрыторыі і растлумачыў меры засцярогі пры выдаленні раслінных адходаў. На заканчэнне выступлення ўдзельнікам нагадалі алгарытм дзеянняў пры ўзнікненні пажару і нумара тэлефонаў экстранных службаў. Таксама ўсе ўдзельнікі атрымалі наглядна-выяўленчую прадукцыю па пажарнай бяспецы.

У рамках акцыі таксама прайшло прафілактычнае мерапрыемства ў сельскім клубе аграгарадка Ліпляны, арганізаванае інспектарам сектара прапаганды і ўзаемадзеяння з грамадскасцю. Удзельнікам была прапанавана інтэрактыўная гульня, дзе яны змаглі знайсці небяспекі на макеце кватэры, вызначыць прычыны ўзнікнення пажару па ілюстрацыях і абмеркаваць правілы бяспечнай эксплуатацыі печаў. З дапамогай дадатку «МНС Беларусі: дапамога побач» удзельнікі разабралі небяспекі на вадаёмах і прычыны ўзнікнення травяных пажараў.